Royal Coachman

                    კიდევ ერთი ლეგენდა - Royal Coachman. ამ იმიტაციას საკმაოდ საინტერესო ისტორია აქვს. ლეგენდის მიხედვით, მისი პროტოტიპი Leadwing Coachman XIX საუკუნის დამდეგს ერთ - ერთი ინგლისელი ლორდის მეეტლემ დაამზადა თავისი ბატონისათვის. იგი წარმოადგენდა "სველ იმიტაციას" და თანამედროვე ვარიანტთან საერთო ძალიან ცოტა ჰქონდა. წარმოგიდგენთ ორიგინალის რეი ბერგმანისეულ შესრულებას

              ამ იმიტაციამ წარმატებით იმუშავა ამერიკის კონტინენტზეც და აქედან გამომდინარე, საკმაოდ სწრაფად გაჩნდა ადგილობრივი სპეციფიკის გათვალისწინებით დამზადებული ვარიაციები. Royal Coachman - ის ავტორად მიჩნეულია ნიუ იორკელი ჯონ ჰეილი (John Haily), რომელმაც იგი 1878 წელს დამზადა, ისტორია დეტალურად არის გადმოცემული 1943 წელს ჰაროლდ სმედლის (Harold Smedley) მიერ დაწერილ წიგნში "Fly patterns and their origins". დასახელებაში სიტყვა "Royal" - ის გამოჩენა კი დაკავშირებულია ლეგენდარულ ლუის ორვისთან (L.C. Orvis) რომელმაც ეს აღნიშვნა დამზადებისას გამოყენებული წითელი ფერის აბრეშუმის და ზოგადად იმიტაციის "სამეფო" შესახედაობის გამო შესთავაზა საზოგადოებას.

                საინტერესოა, რომ ამერიკელებმა უპირატესობა "მშრალ" ვარიანტს მიანიჭეს. "მშრალი" Royal Coachman - ის დებიუტი Catskill - ის რეგიონს უკავშირდება, რომელიც საკმაოდ სწრაფი დინების მქონე მდინარეებით არის ცნობილი. არსებობს მთელი მიმდინარეობა ე.წ. Catskill Style Dry Flies. მათი საერთო დამახასიათებელი  ნიშანი არის ის, რომ გათვლილნი არიან ე.წ. rough water - ზე (სწრაფი დინება არაერთგვაროვანი ზედაპირით) სათევზაოდ, ანუ იმიტაცია გატარებისას ეყრდნობა კუდს და ფეხებს, ტანი ზედაპირზე არ დევს. კლასიკური "მშრალი" იმიტაციებისგან განსხვავებით, ამ სტილში "ფეხები" - ს იმიტირება ბუმბულის გაცილებით მეტი ხვეულით ხდება, რაც, თავის მხრივ, სატყუარას ზედაპირზე გაჩერებას აადვილებს. 

                     Royal Coachman - ის ძალიან წარმატებული ვარიანტი შექმნა ლი ვულფმა (Lee Wolf) და უწოდა Royal Wolf მისეულ შესრულებაში გამოიყენება ირმისა და ხბოს ბეწვი .

                იმიტაცია იმდენად წარმატებული აღმოჩნდა, რომ დღესდღეისობით არსებობს Royal სტრიმერებიც კი

                    ეს კი დამზადების ერთ - ერთი ვარიანტი დეივი მაკფეილისაგან      

Prince Nymph

                    წარმოგიდგენთ კიდევ ერთ ძალიან ცნობილ იმიტაციას სახელად Prince Nymph. თანამედროვე ლიტერატურაში ჯერ კიდევ არ წყდება დავა ამ ნიმფის წარმოშობის შესახებ. ზოგი ავტორის აზრით, იგი პირველად 1930 - იან წლებში დაამზადეს ძმებმა დონ და დიკ ოლსონებმა (Don & Dick Olson) მათი შესრულებით ამ სატყუარას ეწოდებოდა Forked-Tail Nymph. ზოგი მოსაზრებით კი იგი 1941 წელს შექმნა კალიფორნიელმა დუგ პრინცმა (Doug Prince). არსებობს კიდევ ერთი თეორია, რომლის თანახმადაც ცნობილი მაღაზიის მფლობელს ბაზ ბაზეკს (Buz Buszek) სურდა ამ იმიტაციის თავის კატალოგში შეტანა, მაგრამ არ ახსოვდა მისი პირვანდელი სახელი და ამიტომაც უბრალოდ უწოდა Prince Nymph. ასეა თუ ისე ეს იმიტაცია ძალიან ეფექტური გამოდგა და მალევე გაითქვა სახელი.

            Prince Nymph ე.წ. "ფანტაზიური" იმიტაციების კატეგორიას განეკუთვნება, ანუ არ ასახავს ერთ რომელიმე კონკრეტულ მწერს. მიუხედავად ამისა, კონტრასტულობისა და ფორმის გამო იგი ამავდროულად ერთგვარ კრებით მახასიათებელ ნიშნებს ატარებს, რაც თევზისათვის განსაკუთრებით მომხიბვლელია.

                 ზომიდან გამომდინარე იგი სხვადასხვა მწერის იმიტირებისათვის გამოიყენება, მაგალითად 6 დან 10 ნომრამდე ასახავს მეგაზაფხულის ნიმფას, 14 - 16 ნომრებზე დამზადებისას მედღეურას, რაც არ უნდა გასაკვირი იყოს 18 და 16 ნომრები წარმატებით გამოიყენება მედღეურას ემერჯერის იმიტირებისათვის, რასაც ხელს უწყობს თეთრი "ფრთები". 

                 ორიგინალურ ვარიანტში მისი დამზადებისათვის გამოიყენებოდა შავი ფერის ფარშევანგის ბუმბული. თუმცა დღესდღეისობით სტანდარტულად მიიჩნევა შემდეგი მასალები.

              კუდი: ბატის ყავისფერი ბიოტები,
              ტანი:  ფარშევანგის მწვანე ბუმბული,
              სეგმენტაცია: სპილენძისფერი მავთული ან მრგვალი ლურექსი,
              ფეხები: ქათმის ყავისფერი ბუმბული,
              ფრთები: ბატის თეთრი ბიოტები.

             შესაძლებელია ამ იმიტაციის დამძიმება ტყვიის მავთულით ან/და სპილენძის ან ვოლფრამის სხვადასხვა ფერის თავით.

              ესეც ამ იმიტაციის დამზადების ერთ - ერთი ვარიანტი