Saturday, April 19, 2014

19.04.2014 არაგვი

               

                ისევ არაგვს ვესტუმრე. სანამ ადგილამდე მივედი როგორც იქნა ისევ ვიგრძენი, რომ ჩემი თბილისი ისევ ძალიან მიყვარს. წინასააღდგომო დღეების დამსახურებაა, რომ ორთაჭალიდან მცხეთამდე არცერთი რბილი "ლ" არ გამიგია, არცერთი აქოთებული მგზავრი არ  შემხვედრია და ჰოი საოცრებავ - მეტროში დავჯექი კიდეც (პირველად, ალბათ ბოლო 5 წლის განმავლობაში). სამაგიეროდ უკიდურესად მყრალი სიტუაცია დამხვდა უშუალოდ არაგვზე, მგონი ისევ წინასააღდგომო სამზადისის გამო სულ რაღაც 200 მეტრიან მონაკვეთში ხუთი ფიზიკურად, მენტალურად და სულიერად მყრალი ეკრანშიკი "პატრულირებდა". დიდი მადლობა გარემოს დაცვის სამინისტროს. რამდენიმე ხმამაღალი სიტყვის შემდეგ (სადაც ვიდექი ზუსტად იქ მიტარებდენ ეკრანებს) დაახლოებით 20-25 მეტრის სიგრძის სანაპირო ზოლი დავისაკუთრე. მდინარე იყო მკვდარი. ბრწყინვალე ამინდის და მწერების აქტიურობის მიუხედავად არცერთი თევზი არ მინახავს ზედაპირზე. სამაგიეროდ საკმაოად საინტერესო ამბავი შემემთხვა. მოკლედ ძალიან ბევრი პატარა ბაყაყია, ხოდა ერთ-ერთი, სადაც ნაბიჯი გადავდგი, იქ გამომყვა. პირველიდან ხუთ საათამდე ვიყავი მდინარეზე და გვერდიდან არ მომშორებია. თან რაღაცას აშკარად "მელაპარაკებოდა", ბოლოს სურათიც გადავუღე, ძალიან მშვიდად მიიღო ჩემი ეს მოქმედება და პოზირებაზეც უარი არ უთქვამს, მისი ზომა რომ წარმოიდგინოთ, ქვა, რომელზედაც ზის დაახლოებით ხელის მტევნის ზომისაა


        მოკლედ ხასიათის ცოტა გამოსაკეთებლად ექსპერიმენტების ჩატარება გადავწყვიტე, პიველ რიგში Red Tag, შემდეგ Copper John, შემდეგ Flashback Pheasant Tail Nymph, აქედან მხოლოდ Copper John -მა მოხიბლა თითის სიგრძე თეთრულა


                ბოლოს ისევ სპაიდერების კლასიკურ ტრიოზე გავერთე,


       ერთი საინტერესო დაკვირვება - ზოგადად, კლასიკური სპაიდერები, მშრალი იმიტაციისათვის განკუთვნილ, მაქსიმალურად მსუბუქ ნემსკავებზე მზადდება, რათა სატყუარამ წყლის ზედაპირთან ახლოს იმოძრაოს, ხოდა მეც ვცადე Tiemco - ს 100 სერიაზე დამზადებული სტუარტის სპაიდერი, შედეგი აბსოლუტური ნული, სამაგიეროდ, როგორც კი ნიმფის ნემსკავზე დამზადებულ, ჩემთვის ჩვეულ ვარიანტზე გადავედი, ზუსტად იმ ადგილას, ზუსტად იგივე გატარებით, თითოეული მიწოდება თევზით სრულდებოდა, აქედან გამომდინარე ჩვენი თევზი სპაიდერებს არ აღიქვამს, როგორც ამა თუ იმ მწერის ზედაპირული ან მასთან მიახლოებული აქტივობის იმიტაციას, არამედ იღებს კონკრეტულად ფსკერიდან, გაურკვეველია რატომ? სტუარტის სპაიდერი არც ფერით და არც ფორმით არ ჰგავს მდინარის ფსკერზე მცხოვრებ არცერთ ცოცხალ არსებას, არადა იმიტაცია ზუსტად რომ ფსკერზე მოძრაობდა, ამას ადასტურებს ის ხავსიც, რომელიც სატყუარას ხშირად მოყვებოდა. კიდევ ერთი ფაქტი - დღეს ასევე ძალიან კარგად იმუშავა Partridge&Green - მა, თითქმის ისევე კარგად, როგორც Stewart's Black Spider - მა.


           ნუ ახლა სტუარტი რა თქმა უნდა მოწოდების სიმაღლეზე რჩება


       ისე ეს ერთფეროვნება უკვე მოსაწყენი ხდება...ალბათ არაგვიდან რეპორტებს აღარ დავდებ აქ, თუ რა თქმა უნდა მდგომარეობა არ გაუმჯობესდება, რისი იმედიც, სამწუხაროდ ამ ეტაპზე არ მაქვს. ალბათ დასავლეთისკენ გადავინაცვლებ ან, თუ დრო მექნა, ჩემს Neverland - საც ვესტუმრები


        და ბოლოს - კიდევ ერთი დასტური იმისა, რომ თანამედროვე სპორტული თევზჭერის მეთოდებს შორის Fly Fishing არის ყველაზე იაფი, ეს სატყუარები მეორე სეზონია მემსახურებიან, ახლა ცოტა შესახედაობით ვერ არიან მთლად ლამაზები, მაგრამ მხოლოდ იმიტომ, რომ ეს წუთია არაგვიდან დავბრუნდი და უბრალოდ გავრეცხე, როდესაც გაშრებიან, ორთქლში გავატარებ და პირვანდელ სახეს მიიღებენ. 


               ეს იმ არამკითხე "ექსპერტების" გასაგონად, თვითონ მხოლოდ YouTube-ზე რომ აქვთ ნანახი ეს მეთოდი. ძვირი არა, მაგრამ ყველაზე ადამიანური, სამართლიანი და რთული კი ბატონო და ამაში მას ვერცერთი სხვა მეთოდი ვერ შეედრება. მისი ელიტარულობა სწორედ ამაში გამოიხატება და არა ფასში.

Monday, April 14, 2014

2014 წლის სეზონის გახსნა


                კვირას ვერ მოვითმინე და სეზონის გახსნა გადავწყვიტე.  ყველაზე ოპტიმალურ ადგილად ისევ არაგვი მგონია, მტკვართან შედარებით ნაკლებად მღვრიეა. არანაირი ექსპერიმენტების ჩატარების დრო არ მქონდა, ამიტომ ისევ სპაიდერებს მივენდე და ცოტა გავერთე კიდეც. სტუარტის სპაიდერმა ჩვეული კლასი აჩვენა


            სამწუხაროდ ქაშაპი ვერ დავიჭირე და მხოლოდ რაღაც გაურკვეველი ნადავლი მერგო, თეთრულა ნამდვილად არ არის, არც ვიმბა და არც ნაფოტა. მოკლედ აი ასეთი ზომის თევზი აქტიურობდა და  რამდენიმეთვიანი უმოქმედობის შემდეგ  მაინც სასიამოვნო იყო კლასიკური ეკიპირებითა და მონტაჯით სატყუარის შედეგიანი გატარება



               თევზისა და სატყუარის ზომიდან გამომდინარე მესამე კლასის გამოყენება ერთი შეხედვით უფრო ეფექტური იქნებოდა, მაგრამ, ჩვეულებისამებრ, სეზონის გახსნაზე ყოველთვის ჩემი პირველი ანკესი - 5/6 კლასის Sonik Sk3 დამაქვს და არც ამჯერად მინანია, საკმაოდ ძლიერ ქარში შედარებით მძიმე კლასის შნური გაცილებით კომფორტულად გათევზავებთ.  ერთი და იგივე სატყუარის მონოტონურად, მთელი დღის განმავლობაში გამოყენება საკმაოდ მომაბეზრებელია, ამიტომ იგივე სპაიდერის დეივი მაკფეილისეული ვარიაციის გამოყენებაც ვცადე, რომელმაც შარშან მშვენივრად იმუშავა, მაგრამ ამჯერად შედეგი ნულია


             მოკლედ სახლში დარჩენას არაგვზე სტუმრობა ნამდვილად სჯობდა. ესეც სასიამოვნო დღის არანაკლებ სასიამოვნო დასასრული



       

Saturday, April 5, 2014

North Country Spiders

         დღესდღეისობით რთულია იმის თქმა ან მითუმეტეს მტკიცება, თუ კონკრეტულად როდის გამოჩნდნენ ასპარეზზე ამ ტიპის იმიტაციები. ყველაზე გავრცელებული მოსაზრების თანახმად მათი ისტორია უკვე სამ საუკუნეზე მეტს ითვლის და რა თქმა უნდა უკავშირდება ბრიტანეთის გაერთიანებულ სამეფოს, კონკრეტულად კი მის ჩრდილოეთ ნაწილს. ავტორთა უმეტესობის ვერსიით, პირველად სპაიდერების აღწერილობა მოცემული იქნა 1807 წელს გამოცემულ წიგნში List of Wharfedale Flies, მისი ავტორი გახლდათ ინგლისელი ფერმერი ჯონ სვარბრიკი (John Swarbrick) 


        მიუხედავად იმისა, რომ ამ წიგნში მოცემულია საკმაოდ დეტალური აღწერილობები, სპაიდერებმა პირველ ეტაპზე წარმატება ვერ მოიპოვა, რადგან მათი გამოჩენა დაემთხვა კლასიკური, ფრთიანი სველი იმიტაციების პოპულარობოს პიკს.
        მხოლოდ XIX საუკუნის ბოლოს, კერძოდ კი 1885 წელს ტომას ევან პრიტის (T.E. Pritt) მიერ გამოცემულმა წიგნმა Yorkshire Trout Flies, და ერთი წლის შემდეგ მისმა გადამუშავებლმა ვარიანტმა North Country Flies მოიტანა საყოველთაო აღიარება.



        ავტორთა ეს ჩამონათვალი ნამდვილად არასრული იქნებოდა თუკი არ მოვიხსენებთ ისეთ ცნობილ ადამიანებს, როგორებიც არიან ჰარფილდ ედმონდსი და ნორმან ლი (Harfield Edmonds, Norman Lee) მათი, 1916 წელს გამოცემული წიგნით "Brook and River Trouting"



             უილიამ სტუარტის (William Stewart) 1857 წელს გამოცემული The Practical Angler 


              კლასიფიკაციის მხრივ სპაიდერებს იმიტაციათა სისტემაში შემდეგი ადგილი უკავიათ: Wet Flies - Soft Hackled Wet Flies - North Country Flies - North Country Spiders. როგორც წინა სტატიაში აღვნიშნეთ, ზოგადად Soft Hackled Wet Flies დამახასიათებელი ნიშანი რბილი ბუმბულის გამოყენებით მოძრაობის მაქსიმალურად რეალისტურად ასახვაა, სწორედ ეს მომენტი არის წამოწეული წინა პლანზე სპაიდერებში. ისინი იმპრესიონისტული იმიტაციების კატეგორიას განეკუთვნებიან, შესაბამისად არ ახდენენ რომელიმე კონკრეტული მწერის ზუსტ ასახვას, სამაგიეროდ ახდენენ თევზისათვის უკიდურესად მიმზიდველი აქტივობის იმიტირებას. დღემდე არ არსებობს საერთო აზრი იმის შესახებ თუ მწერის განვითარების რომელ ეტაპს შეესაბამებიან ისინი, ზოგი ავტორი თვლის რომ სპაიდერები არასრულად განვითარებულ, ემერჯენციის დროს დაღუპულ რუისელებსა და მედღეურებს   ასახავენ, ზოგი კი იმ აზრს ემხრობა რომ ამ კლასის სატყუარათა დანიშნულება არის თევზის სხვადასხვა კვებითი ობიექტის მოძრაობისათვის მაქსიმალურად რეალისტური მიბაძვა. ისტორიულად სპაიდერების გატარების არეალი დინების შუა და ზედაპირთან ახლოს არსებული მონაკვეთია, თუმცა ჩვენთან ისინი კარგად მუშაობენ ფსკერთან გატარების დროსაც. აღსანიშნავია კიდევ ერთი განმასხვავებელი ნიშანი, ბუმბულის დახვევისას საჭიროა მაქსიმუმ 2 - 3 ხვეული ნემსკავის ტანზე, რითაც მიიღწევა კონკრეტული ბუმბულის თითოეული მეორადი განშტოების თავისუფალი და შესაბამისად მაქსიმალურად რეალისტური "თამაში".
       ბლოგზე უკვე განთავსებული მაქვს რამდენიმე სტატია სპაიდერთა კლასის განსაკუთრებით ეფექტურ იმიტაციათა შესახებ, სადაც დეტალურად შეგიძლიათ გაეცნოთ მათ ისტორიას და დამზადების ტექნიკას, ამიტომ შემდეგი სტატიის თემა იქნება სპაიდერებით თევზაობისათვის საჭირო აღჭურვილობა და ჭერის ტაქტიკა.